Universitetimiz olimlari "XII Xalqaro Turk dunyosi tadqiqotlari" simpoziumida
2025-yil 21–23 may kunlari Turkiyaning Niyde Omer Halisdemir universitetida bo‘lib o‘tayotgan "XII Xalqaro Turk dunyosi tadqiqotlari" simpoziumida Alisher Navoiy nomidagi Toshkent davlat o‘zbek tili va adabiyoti universitetining professor-o‘qituvchilari va tayanch doktorantlari faol ishtirok etmoqda.
Ushbu nufuzli ilmiy anjuman doirasida, Tarjima nazariyasi va amaliyoti kafedrasi tomonidan ilgari surilgan ilmiy yo‘nalish doirasida Mahmadiyor Asadov tomonidan qadimgi Sharq mumtoz matnlari va mifologik qatlamlar asosida tahlil etilgan “Bilgamish – eng qadimgi turkiy epos” mavzusidagi ma’ruza tinglovchilarda katta qiziqish uyg‘otdi. Jahon adabiyoti va qiyosiy adabiyotshunoslik kafedrasi qoshidagi ilmiy yo‘nalishda olib borilayotgan tadqiqotlar doirasida tayanch doktorant Dilnavoz Najimova tomonidan tayyorlangan “O‘zbek bolalar adabiyotining ildizlari: unutilgan an’analar va yangicha qarashlar” mavzusidagi ma’ruza o‘zbek bolalar adabiyotining shakllanish bosqichlari va zamonaviy talqinlariga yangicha yondashuv bilan baholandi.
Nazariy va amaliy tilshunoslik kafedrasi faoliyati doirasida etimologik va semantik tadqiqotlarga asoslangan yondashuvni namoyish etgan Kamola Abduvaliyeva esa “Shajarayi turk” asaridagi etnonimlarning ma’noviy-mavzuiy tasnifini tahlil etib, o‘zbek tilshunosligida turkiy xalqlar tarixini aks ettiruvchi nom-shakllar tadqiqining dolzarbligini asoslab berdi.
O‘zbek adabiyoti tarixi va matnshunoslik kafedrasida olib borilayotgan zamonaviy tahliliy adabiyotshunoslik metodlariga tayangan holda tayanch doktorant Fazilat Muhammadiyeva tomonidan tayyorlangan “Luqmon Bo‘rixonning ‘Kutilgan kun’ hikoyasida qahramon ruhiy holati tasviri” mavzusidagi ma’ruza psixologik obraz yaratishning badiiy vositalari haqida yangi qarashlarni ilgari surdi.
Shu bilan birga, Xorijiy tillar kafedrasi tarkibidagi stilistika va lingvokulturologiya yo‘nalishida olib borilayotgan tadqiqotlar doirasida o‘qituvchi Maqsadxon Abdraxmanova tomonidan tayyorlangan “Zamonaviy tilshunoslikda modallik kategoriyasining stilistik xususiyatlari” mavzusidagi ma’ruza matn tahlilida modallikning stilistik ifoda vositasi sifatidagi rolini o‘rganishga bag‘ishlandi.
Shuningdek, shu kafedra o‘qituvchisi Zebiniso Bekmuradova tomonidan taqdim etilgan “Xiazmatik maqollar lingvokulturologiyasi” mavzusidagi chiqishda xalq maqollaridagi madaniy arxetiplar, xalq tafakkurining xususiyatlari hamda chiasm usulining lingvistik tabiatiga e’tibor qaratildi.
Simpoziumda taqdim etilgan ushbu ma’ruzalar ilmiy hamjamiyat tomonidan iliq kutib olindi. Ular zamonaviy o‘zbek filologiyasi va tilshunosligining turkiy madaniy meros, matn tahlili, bolalar adabiyoti, stilistika va tarjima nazariyasi yo‘nalishlarida olib borilayotgan tadqiqotlari xalqaro miqyosda qanday e’tirof etilayotganining yorqin dalilidir.