Tyutorlar faoliyati tahlil qilindi
2026-yil 26-iyun kuni Alisher Navoiy nomidagi Toshkent davlat o‘zbek tili va adabiyoti universitetida tyutorlar faoliyati samaradorligini baholash (KPI) yuzasidan hisobot yig‘ilishi bo‘lib o‘tdi. Unda tyutorlarning o‘tgan davr mobaynida amalga oshirgan ishlari atroflicha ko‘rib chiqilib, talaba-yoshlar bilan ishlash jarayonida erishilgan natijalar tahlil qilindi. Yig‘ilish tyutorlik faoliyatini yanada takomillashtirish hamda belgilangan vazifalar ijrosini samarali tashkil etish maqsadida tashkil etildi.
Hisobotlar davomida tyutorlarning talaba-yoshlarni vatanparvarlik, milliy va umuminsoniy qadriyatlarga sadoqat ruhida tarbiyalash, ularning shaxsiy va kasbiy rivojlanishini qo‘llab-quvvatlash borasida olib borgan ishlari muhokama qilindi. Shuningdek, talabalarning ta’lim jarayoniga muvaffaqiyatli moslashuvi, ijtimoiy faolligini oshirish hamda bo‘sh vaqtlarini mazmunli tashkil etishga qaratilgan tashabbuslar yuzasidan amalga oshirilgan ishlar tahlil etildi.
Yig‘ilishda har bir tyutorning faoliyati KPI mezonlari asosida baholanib, hisobot natijalari yuzasidan fikr va mulohazalar bildirildi. Erishilgan yutuqlar bilan bir qatorda, mavjud kamchiliklar ham ochiq muhokama qilinib, ularni bartaraf etish bo‘yicha amaliy tavsiyalar ishlab chiqildi. Bu esa tyutorlik faoliyatining sifat ko‘rsatkichlarini yanada oshirishga xizmat qilishi ta’kidlandi.
Shuningdek, kelgusidagi ustuvor vazifalar yuzasidan mas’ullarga tegishli topshiriqlar berildi. Talabalar bilan individual ishlash tizimini kuchaytirish, ularning muammolarini o‘z vaqtida aniqlash va samarali yechimlar ishlab chiqish, ma’naviy-ma’rifiy hamda tarbiyaviy tadbirlar sifatini oshirish bo‘yicha aniq yo‘nalishlar belgilab olindi.
Yig‘ilish yakunida tyutorlik faoliyatini zamonaviy talablar asosida tashkil etish, KPI mezonlari orqali faoliyat samaradorligini muntazam baholab borish hamda talaba-yoshlar bilan ishlash sifatini yangi bosqichga olib chiqish muhim vazifa ekani alohida qayd etildi. Mazkur hisobot yig‘ilishi universitetda ta’lim va tarbiya jarayonlari samaradorligini oshirishga qaratilgan tizimli ishlarning navbatdagi muhim bosqichi bo‘ldi.