Toshkent Fransuz Alyansida ochiq eshiklar kuni
27-sentabr kuni Fransiya elchixonasi qoshidagi Toshkent Fransuz Alyansida “Ochiq eshiklar kunida biz bilan uchrashishga va Alliance Française de Tashkent bilan tanishishga taklif” nomli tadbir tashkil etildi. Tadbirda Alisher Navoiy nomidagi o’zbek tili va adabiyoti universiteti va Toshkent Fransuz Alyansi o'rtasida o'zaro hamkorlik va uni mustahkamlash maqsadida fransuz tili yo’nalishi 1-2-3 bosqich talabalari hamda ushbu tilni ikkinchi chet tili sifatida o’rganayotgan ingliz tili yo’nalishi talabalari, qolaversa, ularga fransuz tilidan ta’lim berayotgan ustozlari ham faol ishtirok etishdi. Ochiq eshiklar kunida Fransiyaning O‘zbekistondagi elchisi Oreliya Buchez xonim, Toshkent Fransuz Alyansi direktori Dilshod Axmedov , elchixona ma’sullari, shuningdek, talabalarimizning fransuz tilini mukammal o’rganishlarida o’z hissalarini qo’shib kelayotgan volontyor o’qituvchilar Maxime Chene va Theo Gardeslar ham qatnashdilar. Universitetimiz talabalari Fransuz Alyansi tomonidan tashkil etilgan tanlov va viktorinalarda qatnashib turli sovrinlarga, fransuzcha kitoblarga ega bo’lishdi. Bundan tashqari barcha talabalar Alyansning kitoblar fondi bilan tanishib, bu kutubxonaga a’zo bo’lishdi. Tadbirdan so’ng Fransuz Alyansi tomonidan tashkil etilgan Fransiya milliy taomlaridan iborat bayram dasturxoni ham yoyildi. Bu mo'jaz dasturxon atrofida talabalarimiz Fransiyaning milliy taomlari va urf-odatlari bilan tanishishdi.
