Qizlar ta’limiga e’tibor
O‘zbekiston Respublikasi Prezidentining 2025-yil 14-martdagi PQ-103-son qarori doirasida, oila va xotin-qizlarni qo‘llab-quvvatlash tizimini yanada takomillashtirish maqsadida, Alisher Navoiy nomidagi Toshkent davlat o‘zbek tili va adabiyoti universiteti muhim chora-tadbirlarini amalga oshirmoqda. Ushbu qaror, xususan, ayollarning ta’limga kirish imkoniyatlarini kengaytirish, ularni oliy ta’lim muassasalariga jalb qilish va ijtimoiy himoya choralari orqali qo‘llab-quvvatlashga urg‘u beradi. Universitet ushbu yo‘nalishda Yakkasaroy va Bektemir tumanlariga biriktirilgan holda faol ishlar olib bormoqda va quyidagi yo‘l-xarita asosida harakat qilmoqda. Universitet tomonidan birinchi navbatda Yakkasaroy tumanidagi 73-sonli va Bektemir tumanidagi 290-sonli umumta’lim maktablari bilan yaqindan hamkorlik o‘rnatildi. Ushbu maktablarda universitetning ta’lim imkoniyatlarini targ‘ib qilish maqsadida maxsus “universitet burchaklari” tashkil etildi. Ushbu burchaklarda ta’lim yo‘nalishlari (masalan, o‘zbek tili va adabiyoti, tarjima ishi, jurnalistika va boshqalar), qabul kvotalari, o‘tish ballari, ta’lim shakllari (kunduzgi, sirtqi, masofaviy) va universitetda o‘qishning afzalliklari haqida to‘liq ma’lumotlar aks ettirildi. Burchaklar dizayni yoshlar uchun jozibador tarzda ishlab chiqildi va vizual materiallar bilan boyitildi. PQ-103 qarorida belgilangan topshiriqlar asosida universitet rasmiy veb-saytida maxsus bo‘lim ochildi, unda barcha ta’lim dasturlari, qabul jarayoni va motivatsion ma’lumotlar joylashtirildi. Ushbu ma’lumotlar QR-kod orqali shakllantirilib, maktab foyeslarida o‘rnatilgan pannolarda aks ettirildi. Bundan tashqari, flayerlar, bukletlar va bannerlar tayyorlanib, ular orqali o‘quvchilar va ota-onalar uchun qulay tarzda axborot yetkazildi. Ushbu materiallarda universitetning zamonaviy ta’lim imkoniyatlari, grantlar, ijtimoiy stipendiyalar va xotin-qizlarni qo‘llab-quvvatlash bo‘yicha maxsus dasturlar haqida batafsil ma’lumot berildi. Universitetning yetakchi professor-o‘qituvchilari va talabalari jalb qilingan holda, biriktirilgan tumanlardagi maktablarda ota-onalar va o‘quvchi-qizlar bilan uchrashuvlar tashkil etildi. Ushbu uchrashuvlarda oliy ta’limning ahamiyati, kasb tanlashda qizlar uchun mavjud imkoniyatlar va universitetda o‘qish jarayoni haqida ochiq suhbatlar o‘tkazildi. Xususan, ijtimoiy himoyaga muhtoj oilalardan bo‘lgan qizlar uchun maxsus qo‘shimcha mashg’ulotlar va tayyorgarlik kurslari taklif qilindi, bu esa ularning ta’limga kirishda muvaffaqiyatli ishtirok etishiga yordam beradi. O‘quv jarayoni yakunlanishidan oldin, universitet tomonidan “Ochiq eshiklar kuni” tadbiri maktab bitiruvchisi qizlarni jalb qilish maqsadida rejalashtirildi. Ushbu tadbirda universitetning auditoriyalari, kutubxonasi, ilmiy markazlari va sport inshootlari bilan tanishish imkoniyati taqdim etiladi. Shuningdek, bitiruvchi qizlar uchun maxsus grafik ishlab chiqildi, unda ularning universitetga tashriflari va maslahat olish kunlari aniq belgilandi. Bu tadbirlar orqali qizlarning oliy ta’limga bo‘lgan qiziqishi yanada oshishi kutilmoqda. Alisher Navoiy nomidagi Toshkent davlat o‘zbek tili va adabiyoti universiteti barcha qizlarni oliy ta’lim olishga da‘vat etadi. Ijtimoiy himoyaga muhtoj oilalardan bo‘lgan qizlar uchun maxsus imkoniyatlar mavjud bo‘lib, ular bilan ishlash bo‘yicha alohida dasturlar rejalashtirilgan. Universitetimiz xotin-qizlarning ta’lim olishdagi salohiyatini ochishga qaratilgan ushbu loyihani muvaffaqiyatli amalga oshirishda davlat siyosatini qo‘llab-quvvatlaydi va kelajakda ham bu yo‘nalishda faol ishlarni davom ettiradi.
