Mashhur Seviliya universiteti vakillari ToshDO‘TAUda
Talabalar uchun o‘quv yili tugadi, ammo Alisher Navoiy nomidagi Toshkent davlat o‘zbek tili va adabiyoti universitetida hayot qaynamoqda. Yoz- bu yangi o‘quv yiliga jiddiy tayyorlanish, yangi rejalar tuzish va yangi hamkorlar bilan muzokaralar olib borishning ayni vaqti.
Jumladan, kuni kecha universitetimizga dunyoga mashhur Seviliya universiteti vakillari keldilar. Seviliya universiteti Xalqaro aloqalar bo‘yicha prorektori Rosario Asian Chaves boshchiligidagi delegatsiyani universitetimiz xalqaro hamkorlik bo‘yicha prorektori Nozliya Normurodova kutib oldi.
Seviliya universiteti O‘zbekistondagi yetakchi OTMlar bilan Erasmus+ doirasida yangi loyihalar tayyorlash, talabalarning akademik almashinuvini yo‘lga qo‘yish, o‘quv jarayoniga doir sohalarda hamkorlik o‘rnatishni istaydi. Bunda aynan Alisher Navoiy nomidagi Toshkent davlat o‘zbek tili va adabiyoti universitetini tanlaganlari bejiz emas. Chunki xalqaro loyihalarda munosib ishtirok etish bo‘yicha ToshDO‘TAUning faoliyati juda ijobiy baholanadi.
Eslatib o‘tamiz, qisqa muddatda ToshDO‘TAU 7 ta Erasmus+ doirasida loyihalar qo‘lga kiritilgan. Shundan 3 tasi yakunlangan va 4 ta loyiha hamon davom etmoqda.
