“Ma’rifat maydoni – 2026” universitet bosqichi bo'lib o'tdi
27-noyabr kuni Alisher Navoiy nomidagi Toshkent davlat o‘zbek tili va adabiyoti universitetida “Ma’rifat maydoni – 2026” ko‘rik-tanlovining universitet bosqichi yuqori saviyada tashkil etildi. Tanlovda Ijtimoiy-gumanitar fanlar yo‘nalishining “Taraqqiyot”, O‘zbek tili va adabiyoti yo‘nalishining “Yangi jadidlar” hamda Filologiya va tillarni o‘qitish yo‘nalishining “Yuksalish” jamoalari ishtirok etib, uchta shart bo‘yicha o‘z bilim va mahoratlarini namoyish etdilar. Har bir jamoa sahnaga o‘ziga xos tayyorgarlik bilan chiqib, nafaqat iqtidor va izlanishlarini, balki jamoaviy hamjihatlik, sahna madaniyati va ijodiy ishlanmalarini ham namoyon qildi.
Tanlov jarayonida jamoalar o‘rtasida sog‘lom raqobat, o‘zaro hurmat va madaniyat hukm surdi. Har bir chiqish nafaqat hakamlar hay’atida, balki yig‘ilgan tomoshabinlarda ham katta qiziqish uyg‘otdi. Shartlar davomida talabalar turli yo‘nalishlarda o‘z intellektual salohiyatini, mustaqil fikrlash ko‘nikmalarini va sahnadagi o‘zini tutish madaniyatini ko‘rsatib, tanlovga yuqori ruh va yorqin taassurot bag‘ishladilar.
Yakunda Filologiya va tillarni o‘qitish yo‘nalishining “Yuksalish” jamoasi birinchi o‘ringa loyiq topildi. O‘zbek tili va adabiyoti yo‘nalishining “Yangi jadidlar” jamoasi ikkinchi o‘rinni, Ijtimoiy-gumanitar fanlar yo‘nalishining “Taraqqiyot” jamoasi esa faxrli uchinchi o‘rinni qo‘lga kiritdi. Ushbu natijalar jamoalarning puxta tayyorgarligi, mas’uliyat bilan yondashuvi va sermahsul ijodiy mehnatining samarasi sifatida e’tirof etildi.
Tadbir yakunida barcha jamoalarga faol ishtiroki, olib kelgan qiziqarli loyihalari, sahnadagi ijobiy energiyasi va bilimga chanqoqligi uchun universitet rahbariyati va tashkilotchilar tomonidan minnatdorchilik bildirildi. “Ma’rifat maydoni – 2026” tanlovining bugungi bosqichi nafaqat talabalarning iqtidorini namoyish etish maydoni, balki ularning kelgusidagi katta yutuqlarga yo‘l ochuvchi muhim jarayon bo‘lib xizmat qildi. Ishtirokchi jamoalarning har biri o‘zining akademik salohiyati, jamoaviy hamjihatligi va ijodiy yondashuvi orqali ushbu maydonda munosib ishtirok etganini yana bir bor tasdiqladi.
Umid qilamizki, bugungi muvaffaqiyatlar talabalarimizni yanada yuksak marralar sari ilhomlantirib, ularning ta’lim va ijod yo‘lida yangi eshiklar ochadi. Universitetimizda tashkil etilayotgan bunday tanlovlar yoshlarning intellektual va ma’naviy rivojiga xizmat qilishi, ilm-fan va ma’rifatga bo‘lgan qiziqishini yanada oshirishi shubhasizdir.