Italiyalik olimani o'zbek tili maftun etdi
Avval xabar berganimizdek dunyoga mashhur turkolog olima Elizabet Raganin Erasmus+ dasturi doirasida amalga oshirilayotgan loyihaga muvofiq universitetimizda mehmon bo'lib turibdi. Italiyalik olima o'zbek adabiyoti va tarixiga katta qiziqish bildirdi. Universitetimiz xalqaro hamkorlik bo'yicha prorektori Nozliya Normurodova bilan suhbatda Elizabet xonim kelgusi tadqiqotlarini o'zbek tili va madaniyati kesimida olib borishni istayotganini ma'lum qildi. Buning uchun u o'zbek tilini o'rganishi lozimligini qayd etdi. Albatta, olimaning bu istagini amalga oshirish uchun universitetimiz huzuridagi "O'zbek maktabi" yordamga shay. 24-iyundan Elizabet Raganin "O'zbek maktabi"da o'zbek tilini o'rganishni boshladi. Olima turkiy tillar grammatikasini yaxshi biladi, u turk tilida erkin muloqot qila oladi va bu bilimlari o'zbek tilini o'rganishda unga qo'l kelishiga ishonamiz. Tez orada Elizabet Raganin o'zbek tilida ravon muloqot qilishini tilab qolamiz.
