Boʻlajak psixologlar uchun binar dars
Toshkent davlat o‘zbek tili va adabiyoti universitetida 2023- yil 7- noyabrda Amaliy psixologiya faniga oid binar ma’ruza (Guests-lectures) o‘tkazildi. Unda ma’ruzachilar sifatida Ijtimoiy-gumanitar fanlar kafedrasining katta o‘qituvchisi Boboyor To‘rayev hamda birinchi mutaxassisligi – fransuz tili o‘qituvchisi, ikkinchi kasbi - amaliyotchi-psixolog, shuningdek, "ZOʻRTV" kanali orqali namoyish qilingan mashhur "PSIXOLOG” serialining bosh qahramoni rolini ijro etgan psixolog va aktrisa Nafisa Olg‘irovalar qatnashishdi. Binar ma’ruzada jamiyat va psixologiya fani rivojida o‘zbek tilining roli va ahamiyati; amaliy psixologiya, klinik davolash va notiqlikda so‘z ning roli va qudrati; bugun zo‘r psixolog -notiq bo‘lish uchun nimalar qilish kerak? Bugungi kundagi hayotiy vaziyatlar va munosabatlar psixologiyasida so‘zning tutgan o‘rni kabilar haqida juda qiziqarli va yangi ma’lumotlar berildi. Interaktiv tarzda o‘tkazilgan binar ma’ruzada bugungi kun psixologiyasida juda faollashib borayotgan notiqlik orqali terapiya haqida keng ma’lumotlar va mazkur terapiyani o‘tkazish bo‘yicha qimmatli amaliy maslahatlar berildi.
Ma’ruzachilar tinglovchilarning barcha savollariga batafsil javoblarni berishdi. Ma’ruzada nafaqat bo‘lajak psixologlar, balki universitetning barcha yo‘nalishlaridagi talabalar va o‘qituvchilar qatnashishdi.
