Yurtim qadriyatlari — bizning g‘alabamiz!
Joriy yilning 12-mart kuni Toshkent shahar oliy ta’lim muassasalari o‘rtasida o‘tkazilgan “Yurtim qadriyatlari” respublika tanlovining 2-hududiy bosqichi muvaffaqiyatli yakunlandi. Ushbu nufuzli tanlov yoshlar o‘rtasida milliy qadriyatlarni keng targ‘ib qilish, ularda Vatanga muhabbat va sadoqat tuyg‘ularini yanada mustahkamlash, o‘zbek xalqining boy an’ana va urf-odatlariga hurmat ruhini yuksaltirish maqsadida tashkil etilgan edi.
Tanlov davomida ishtirokchilar uchta asosiy shart bo‘yicha o‘z bilim, ijodiy salohiyati va jamoaviy ruhini sinovdan o‘tkazdilar:
• Milliy qadriyatlar bo‘yicha savol-javob va nazariy bilimlar
• Ijodiy chiqishlar (she’r, maqom, sahna ko‘rinishlari va boshqalar)
• Jamoaviy hamkorlik va ijodiy topshiriqlar
Hakamlar hay’ati tomonidan har bir ishtirokchi va jamoa faoliyati batafsil baholandi. Qizg‘in bahs-munozaralar, yuqori darajadagi ijodiy chiqishlar va jamoaviy ruhning ajoyib namoyishi yakunida Alisher Navoiy nomidagi Toshkent davlat o‘zbek tili va adabiyoti universitetining “Qurama” jamoasi barcha shartlarda eng yuqori natijalarni ko‘rsatib, faxrli 1-o‘rinni qo‘lga kiritdi!
Bu g‘alaba nafaqat jamoamizning mehnati va fidoyiligining mevasi, balki universitetimiz talabalarining milliy g‘urur, Vatanga muhabbat va o‘zbekona qadriyatlar ruhida tarbiyalanganligining yorqin isbotidir. Ushbu muvaffaqiyat bilan jamoamiz a’zolarini, rahbarlarini, murabbiylarini va butun universitet jamoasini chin dildan tabriklaymiz!
Endi bizning jamoamiz oldinda yanada mas’uliyatli va sharafli sinov — tanlovning respublika bosqichi turibdi. “Qurama” jamoasiga keyingi bosqichlarda ham ulkan omad, ijodiy ilhom va yangi g‘alabalar tilaymiz!