Ma’naviy meros va “yumshoq kuch”
Alisher Navoiy nomidagi Toshkent davlat o‘zbek tili va adabiyoti universitetida bugungi globallashuv davrining eng dolzarb mavzularidan biriga bag‘ishlangan “Buyuk mutafakkirlarning O‘zbekiston “yumshoq kuch” siyosatidagi o‘rni” mavzusidagi xalqaro ilmiy seminar o‘tkazildi. Mazkur anjuman mamlakatimizning xalqaro maydondagi nufuzini oshirishda madaniy va ma’naviy omillarning ahamiyatini ilmiy tahlil qilish maqsadida tashkil etildi.
Xalqaro seminarni universitetning O‘zbek tilshunosligi kafedrasi mudiri, filologiya fanlari doktori, professor Zulxumor Xolmanova ochib berdi. U o‘z nutqida zamonaviy dunyoda davlatlarning qudrati nafaqat iqtisodiy yoki harbiy salohiyat, balki intellektual va madaniy meros orqali ham belgilanishini ta’kidladi. Professorning qayd etishicha, O‘zbekiston hududidan yetishib chiqqan buyuk mutafakkirlarning boy ijodiy xazinasi mamlakatimizning “yumshoq kuch” (soft power) salohiyatini mustahkamlovchi eng muhim poydevor hisoblanadi.
Anjumanda xorijiy ekspertlar ham o‘z ma’ruzalari bilan faol ishtirok etishdi. Xususan, Xalqaro iqtisodiy hamkorlik tashkiloti Tehron Madaniyat instituti direktor o‘rinbosari, doktor Ahmet Akalin Alisher Navoiy shaxsiyatining xalqaro imijni shakllantirishdagi o‘rniga to‘xtaldi. Ma’ruzachi Navoiy asarlaridagi insonparvarlik va adolat g‘oyalari butun jahon uchun hamon dolzarb ekanini qayd etib, madaniy diplomatiyani rivojlantirish maqsadida xorijda **“Navoiy institutlari”**ni tashkil etish g‘oyasini ilgari surdi. Bu kabi markazlar o‘zbek tili va madaniyatini xalqaro miqyosda tizimli targ‘ib qilishda samarali vosita bo‘lishi ta’kidlandi.
Shuningdek, professor Manzura Abjalova Navoiy merosini ommalashtirishda zamonaviy yondashuvlar — raqamli platformalar, kino va axborot texnologiyalari imkoniyatlaridan foydalanish zarurligiga e’tibor qaratdi. U universitet jamoasi tomonidan yaratilgan Alisher Navoiy mualliflik korpusi haqida ma’lumot berib, raqamli gumanitar fanlar yo‘nalishidagi yutuqlarni namoyish etdi. Qozog‘istonlik olim Baktiyar Buteyev esa mintaqaviy hamkorlik va ajdodlar merosini birgalikda o‘rganishning ahamiyati haqida to‘xtalib, O‘zbekiston allomalarining jahon sivilizatsiyasidagi o‘rnini yuqori baholadi.
Seminar yakunida ishtirokchilar tomonidan ilmiy hamkorlikni yanada kengaytirish, akademik almashinuv dasturlarini rivojlantirish yuzasidan muhim takliflar bildirildi. Tadbir buyuk mutafakkirlarimizning ma’naviy xazinasi Yangi O‘zbekistonning jahon hamjamiyatidagi nufuzini yanada yuksaltirishga xizmat qilishi haqidagi umumiy xulosa bilan yakunlandi.