Bahor kuychisi – Zulfiya tavalludiga bag‘ishlangan ma’naviy-ma’rifiy tadbir o‘tkazildi
Bahor nafasi ufurib, tabiat uyg‘ongan pallada o‘zbek she’riyatining nozik qalb sohibasi, O‘zbekiston Qahramoni, atoqli shoira Zulfiya tavalludiga bag‘ishlangan ma’naviy-ma’rifiy tadbir tashkil etildi. Tadbir adabiyot ixlosmandlari, professor-o‘qituvchilar va talaba-yoshlarni bir maqsad — shoira ijodini yod etish va uning ma’naviy merosini chuqur anglash yo‘lida birlashtirdi.
Tadbir davomida Zulfiya ijodining o‘ziga xos jihatlari, uning she’riyatidagi bahoriy ruh, Vatanga muhabbat, ayol qalbining latofati, sadoqat va matonat tuyg‘ulari haqida atroflicha so‘z yuritildi. Ta’kidlanganidek, shoira she’rlari bahoriy shabadadek mayin, ayni paytda kuchli va ta’sirchan bo‘lib, o‘quvchini ezgulikka, sabr-bardoshga, yorug‘ kelajakka ishonch ruhida tarbiyalaydi.
Tadbir jarayonida talabalar tomonidan shoira qalamiga mansub she’rlar ifodali o‘qildi, “Bahor keldi seni so‘roqlab…” misralari esa yig‘ilganlarda alohida hayajon uyg‘otdi. Ushbu satrlarda nafaqat tabiatning uyg‘onishi, balki inson qalbidagi sog‘inch, umid va muhabbat ham aks etishi ta’kidlandi. Zulfiya she’riyatida bahor – yangilanish, poklanish va ezgulik ramzi sifatida talqin etilishi alohida e’tirof etildi.
Shuningdek, shoira hayot yo‘li ham yoshlarga ibrat maktabi ekani qayd etildi. U sadoqat va matonat timsoli sifatida og‘ir sinovlarni mardona yengib o‘tgan, ijodi va shaxsiyati bilan butun bir avlod uchun ma’naviy mezon bo‘lib qolgan. Bugun ham Zulfiya merosi yoshlarni Vatanga muhabbat, adabiyotga mehr va yuksak ma’naviyat ruhida tarbiyalashda muhim o‘rin tutmoqda.
Tadbir yakunida ishtirokchilar tomonidan shoira nomi nafaqat nazm, balki vafo, pok muhabbat va bahor timsoli sifatida qalblarda abadiy yashashi alohida ta’kidlandi.